Хорижий иштирокчилар учун интернетга чекловсиз кириш имконияти яратилди
Екатеринбург шаҳрида бўлиб ўтаётган Халқаро ёшлар фестивали доирасида хорижлик иштирокчилар учун интернет тармоқларидан эркин фойдаланиш имконияти яратилди. "Екатеринбург-Экспо" мажмуасида ўтказилаётган тадбирда меҳмонларга Россияда блокланган сайтлар ва ижтимоий тармоқларга кириш имконини берувчи махсус SIM-карталар тарқатилди.
Фестивал ташкилотчилари иштирокчилар учун уч хил Wi-Fi тармоғини ажратган. Жумладан, "IWYF2026-GLOBAL" тармоғи хорижлик делегатлар учун мўлжалланган бўлиб, унда трафик фильтрацияси ўчирилган. Россия фуқаролари учун мўлжалланган "IWYF2026_UNITED" тармоғида эса "Роскомнадзор" томонидан ўрнатилган чекловлар амал қилади. Тизим фойдаланувчининг аккредитация бейжи рақами орқали унинг фуқаролигини аниқлаб, мос тармоққа уланишни таъминлайди.
Фестивал ишонч телефони ходимларининг маълум қилишича, хорижлик меҳмонларга "одатий сервислар"га киришни таъминлаш мақсадида махсус SIM-карталар берилган. Бу хорижлик иштирокчиларга ўз ижтимоий тармоқларида фестивал жараёнларини ҳеч қандай тўсиқларсиз ёритиб бориш имконини беради. Шунга ўхшаш амалиёт 2026-йилнинг июн ойида Санкт-Петербург иқтисодий форумида ҳам қўлланилган эди.
Эслатиб ўтамиз, Халқаро ёшлар фестивали 2026-йилнинг 11-сентябридан 17-сентябрига қадар давом этади. Тадбир дастуридан концертлар ва турли давлат вакиллари иштирокидаги расмий учрашувлар ўрин олган.
