Сўнгги йилларда ўзбекистонликларнинг хорижий давлатлар чегарасидан ўтишида қийинчиликлар кузатилмоқда. Хусусан, Россия, Туркия, БАА, Грузия ва бошқа мамлакатлар аэропортларида фуқароларнинг кириши рад этилиши ёки қўшимча текширувларга олиниши ҳолатлари кўпайган. Расмий идоралар буни хавфсизлик чоралари, ноқонуний миграцияга қарши кураш ва виза тартибларининг бузилиши билан изоҳламоқда.
Россияда 2024-йил март ойидаги терактдан сўнг Марказий Осиё фуқароларига нисбатан назорат кескин кучайди. Шунингдек, Жанубий Кореяда сайёҳлик визасидан ноқонуний ишлаш учун фойдаланиш, Интерпол қидирувидаги шахслар ва терроризмга алоқадорликда гумон қилинганлар билан боғлиқ ҳолатлар ўзбекистонликлар учун кириш шартларини мураккаблаштирмоқда. 2026-йил июл ойида Грузияда 20 нафарга яқин, 2024-йил ноябр ойида БААда 31 нафар Ўзбекистон фуқаросининг мамлакатга киритилмагани бунга яққол мисолдир.
Кўпгина давлатлар визасиз режим мамлакатга киришнинг мутлақ кафолати эмаслигини таъкидламоқда. Масалан, Монголияда 2024-йилда 167 нафар, 2025-йилнинг дастлабки икки ойида эса 19 нафар ўзбекистонликка кириш рад этилган. Асосий сабаблар сифатида сафар мақсадининг нотўғри кўрсатилиши, меҳмонхона бронлари ёки етарли молиявий маблағнинг йўқлиги кўрсатилмоқда.
Мутахассислар хорижга сафар қилаётган фуқароларга барча ҳужжатларни, жумладан, қайтиш чипталари ва меҳмонхона бронларини олдиндан тайёрлаб қўйишни ҳамда борилаётган давлатнинг миграция қоидаларига қатъий риоя этишни тавсия қилади. Айрим ҳолларда, хусусан, Черногория ва Эквадор каби давлатларда миграция сиёсатининг ўзгариши ўзбекистонликлар учун визасиз тартибнинг бекор қилинишига ёки транзит визаларининг жорий этилишига олиб келди.
