Россиянинг Смоленск вилоятида 1-октябрдан 10-октябргача «Нелегал-2026» комплекс тезкор-профилактика операциясининг иккинчи босқичи ўтказилди. Тадбир давомида миграция қонунчилиги бузилиши билан боғлиқ 300 дан ортиқ маъмурий ҳуқуқбузарлик қайд этилди.
Текширувлар натижасида 120 нафар хорижлик фуқаро Россияга кириш ёки бўлиш қоидаларини бузгани, яна 60 нафардан ортиғи эса белгиланган тартибга риоя қилмагани аниқланди. Шунингдек, 60 дан ортиқ ҳолатда мигрантларни ноқонуний ишга жалб қилиш ва хорижликларнинг рухсатсиз меҳнат фаолияти билан шуғулланиши ҳолатлари фош этилди. Қоидабузарларга нисбатан жами 687 000 рублдан ортиқ жарима белгиланди.
Операция якунлари бўйича 45 нафар хорижлик фуқарога нисбатан Россиядан маъмурий чиқариб юбориш қарори қабул қилинди. Улардан 28 нафари мустақил равишда чиқиб кетиши, 17 нафари эса ИИВ махсус муассасаларига жойлаштирилиши белгиланган. Ҳозирги кунга қадар 25 нафар шахс мамлакат ҳудудидан чиқариб юборилган, 55 нафар хорижликка эса Россияга кириш тақиқланган.
Бундан ташқари, 8 нафар хорижлик фуқарога нисбатан депортация қарори чиқарилиб, шундан 5 таси ижро этилган. Миграция қонунчилигини бузганлик ҳолатлари бўйича 21 та жиноят иши қўзғатилган. Смоленск вилояти ИИВ маълумотига кўра, ҳудудда бундай профилактик тадбирлар давом эттирилади.
