Ханти-Мансийск автоном округининг Кондинский туман суди хорижлик аёлнинг Россиядан чиқариб юбориш тўғрисидаги қарорни бекор қилиш ҳақидаги илтимосини рад этди. Аёл миграция қоидаларини бузгани учун 2000 рубль миқдорида жаримага тортилган ва мамлакатдан маъмурий тартибда чиқариб юборилиши белгиланган.
Суд жараёнида аёл ўз хатосини тан олган, бироқ Россия фуқароси бўлган турмуш ўртоғи ва 7-октябрда туғилган, Россия фуқаролигига эга қизи борлигини важ қилиб келтирган. Шунингдек, унинг турмуш ўртоғи Россияда доимий яшаш жойи ва ишига эга эканлиги таъкидланган.
Бироқ суд қарорида қайд этилишича, Россия фуқароси билан никоҳда бўлиш ёки Россия фуқаролигига эга фарзанднинг мавжудлиги хорижлик фуқарони миграция қонунчилигига риоя қилиш мажбуриятидан озод этмайди. Суд мазкур ҳолатда қонун устуворлигини асос қилиб олиб, полиция томонидан чиқарилган депортация қарорини ўз кучида қолдирди.
Ҳозирги вақтда мазкур суд қарори ҳали қонуний кучга кирмаган. Шу сабабли, аёл юқори инстанция судига шикоят қилиш ҳуқуқига эга. Ушбу ҳолат Россияда яшовчи мигрантлар учун миграция тартиб-қоидаларига қатъий риоя қилиш муҳимлигини яна бир бор эслатади.
