Москва шаҳрининг Янги Москва ҳудудида ҳуқуқ-тартибот органлари ноқонуний миграцияни ташкил этиш ҳолатини аниқлади. Россия ИИВнинг ҳудудий бошқармаси ходимлари томонидан ўтказилган тезкор тадбирлар натижасида 51 ёшли москвалик фуқаро уч нафар Марказий Осиё давлати фуқаросининг Россия ҳудудида ноқонуний бўлишини ташкил этгани маълум бўлди.
Аниқланишича, гумонланувчи шахс Филимонковский туманидаги Поповка қишлоғида жойлашган маиший хоналарда хорижликларга яшаш учун жой ажратган. У хорижий фуқароларнинг Россияда ноқонуний бўлиб турганидан хабардор бўлса-да, уларга пул эвазига бошпана берган ва ижара шартномаларини расмийлаштирмаган. Мазкур ҳолат юзасидан Россия Жиноят кодексининг 322.1-моддаси (ноқонуний миграцияни ташкил этиш) билан жиноят иши қўзғатилган.
Қоидабузарлик содир этган уч нафар хорижлик фуқарога нисбатан Россия Маъмурий ҳуқуқбузарликлар тўғрисидаги кодексининг 18.8-моддаси 3.1-қисми билан баённомалар тузилди. Суд ва тегишли органлар қарорига кўра, уларнинг ҳар бирига 5 минг рубль миқдорида жарима белгиланди ва уларни Россия Федерацияси ҳудудидан мажбурий чиқариб юбориш тўғрисида қарор қабул қилинди.
Мигрантлар учун ушбу ҳолат Россияда бўлиш қоидаларига риоя қилиш муҳимлигини яна бир бор эслатади. Ҳужжатларни расмийлаштирмасдан, ноқонуний тарзда яшаш ва ишлаш нафақат иш берувчи, балки хорижлик фуқароларнинг ўзи учун ҳам Россия ҳудудидан чиқариб юборилиш ва жаримага тортилиш каби жиддий ҳуқуқий оқибатларни келтириб чиқаради.
