Москва вилояти ҳукумати хорижий фуқаролар учун рухсат талаб этиладиган ҳудудлар рўйхатини янгилади. Янги қарорга кўра, аввалги олтита туманни қамраб олган рўйхатдан тўрттаси — Мытищи, Солнечногорск, Подольск ва Щёлково туманлари чиқариб ташланди. Эндиликда махсус тартиб фақат Одинцово округи ва Балашиха шаҳридаги айрим ҳудудларга нисбатан амал қилади.
Ушбу ҳудудларга ташриф буюриш учун хорижий фуқаролар ва уларни қабул қилувчи ташкилотлар олдиндан келишув жараёнини амалга ошириши шарт. Ҳудудларнинг аниқ чегаралари географик координаталар асосида белгиланган бўлиб, улар ҳукумат қарорига илова қилинган ҳужжатларда кўрсатилган. Мигрантлар ўз манзилларини режалаштиришда ушбу янгиланган координаталарга эътибор қаратишлари тавсия этилади.
Шу билан бирга, транзит ҳаракати учун қулайликлар сақлаб қолинди. Хорижий фуқаролар М-1 «Беларусь», М-7 «Волга», М-12 «Восток», Носовихинское ва Рязанское шосселари, шунингдек, Горький темир йўл йўналиши орқали рухсат этилган маршрутлар бўйича тўсиқларсиз ўтишлари мумкин.
Россия Ташқи ишлар вазирлигига ушбу ўзгаришлар ҳақида хорижий давлатларнинг дипломатик ваколатхоналари ва консулликларини хабардор қилиш топширилди. Хорижий фуқаролардан ўз манзиллари махсус тартибдаги зонага тушиш-тушмаслигини текшириш ва тегишли ҳужжатларни олдиндан тайёрлаб қўйиш сўралади.
