Москва ва Москва вилоятида меҳнат фаолиятини амалга ошириш учун патент олишни истаган чет эл фуқаролари учун муҳим огоҳлантириш эълон қилинди. Расмий маълумотларга кўра, патентни воситачилар орқали расмийлаштиришнинг имкони йўқ ва бундай хизматларни таклиф қилаётган шахслар фирибгарлардир. Ҳужжатни олишнинг ягона қонуний йўли — Сахарово кўп тармоқли миграция марказига шахсан ташриф буюришдир.
Воситачиларга мурожаат қилиш мигрантлар учун жиддий ҳуқуқий ва молиявий хавфларни келтириб чиқаради. Хусусан, патент расмийлаштириш муддатини (Россияга киргандан сўнг 30 календарь кун) ўтказиб юбориш 10 мингдан 15 минг рублгача бўлган жаримага сабаб бўлади. Фирибгарлар кўпинча сохта штрих-кодли стикерларни тақдим этишади, аммо улар билан ҳақиқий патент олишнинг иложи йўқ.
Шунингдек, воситачилар ишга жойлашиш тўғрисидаги билдиришномаларни топширишда ёрдам беришни ваъда қилиб, катта миқдордаги маблағни ўзлаштириб олиш ҳолатлари ҳам кузатилмоқда. Бундай ҳолларда Россия ИИВ базасида тегишли маълумотлар бўлмагани сабабли, мигрантнинг патенти кейинчалик бекор қилинади.
Миграция маркази ходимлари ижтимоий тармоқлардаги шахсий хабарлар ёки изоҳлар орқали хизмат таклиф қилаётган шахсларга пул ўтказмасликни қатъий тавсия қилади. Ўзини марказ ходими деб таништирган шахслар билан боғлиқ ҳар қандай шубҳали ҳолатларда пул маблағларини ўтказмаслик ва фақат расмий каналлар орқали маълумот олиш зарур.
