Россиянинг Ямало-Ненец автоном округи, Ноябрьск шаҳрида хорижлик фуқароларни қонунийлаштириш билан шуғулланган жиноий гуруҳ фаолияти фош этилди. Суд материалларига кўра, 2022-2023-йиллар давомида “Ҳуқуқий агентлик кўмак” ва “Ҳамкор ва К” МЧЖлар орқали юзлаб мигрантларга сохта ҳужжатлар тайёрлаб берилган.
Жиноий схема ташкилотчиси Иван Крюченков бўлиб, у мигрантларни ишга жойлаштириш ва уларга Россияда қонуний қолиш имконини берувчи ҳужжатларни расмийлаштириш билан шуғулланган. Шунингдек, гуруҳ таркибидаги тил мутахассиси рус тили бўйича имтиҳонларда иштирокчиларга яширинча ёрдам берган, жавобларни кўрсатиб турган ёки видео ёзувларни қайта ёзиб олган. Ушбу хизматлар эвазига патент учун 6 000 рубл, яшаш гувоҳномаси учун эса 6 500 рубл ҳақ олинган.
Аниқланишича, 2022-йил 17-январдан 2023-йил 21-октябргача бўлган даврда 357 та фуқаролик-ҳуқуқий шартномалар тузилган. Тил имтиҳонидан эса 600 га яқин Ўзбекистон, Тожикистон ва Қирғизистон фуқаролари ноқонуний йўллар билан ўтган. Улар орасида мактаб қурилишида қатнашган ишчилар, новвойхона ва транспорт компаниялари ходимлари ҳам бўлган.
Суд қарорига кўра, гуруҳ ташкилотчиси Иван Крюченков 7 йилга озодликдан маҳрум этилиб, 500 минг рубл жаримага тортилди. Тил имтиҳонини сохталаштирган Илнур Ғаниев 3,5 йилга қамалиб, 200 минг рубл жарима тўлайдиган бўлди. Яна бир иштирокчи Юрий Морейко эса 3 йил шартли жазо ва 150 минг рубл жаримага тортилди.
