Оренбург туман суди 39 ёшли маҳаллий фуқарони хорижликларни сохта рўйхатга олганликда айбдор деб топди. Тергов маълумотларига кўра, ушбу шахс 2024-йил давомида ўз уйига 268 нафар хорижлик фуқарони расмий рўйхатдан ўтказган, бироқ уларга амалда яшаш учун жой ажратмаган.
Суд қарорига кўра, айбланувчи икки йил муддатга мажбурий ишларга жалб этилди. Аниқланишича, мазкур ҳаракатлар даромад олиш мақсадида амалга оширилган бўлиб, «резинали уй» деб аталган манзилда юзлаб мигрантлар қоғозда қайд этилган, аммо ҳақиқатда яшамаган.
Россия қонунчилигига кўра, яшаш жойи бўйича ҳақиқий манзилга эга бўлмасдан туриб рўйхатдан ўтиш «сохта рўйхатга олиш» ҳисобланади. Бундай ҳолатлар аниқланганда, нафақат уй эгаси, балки сохта ҳужжатлардан фойдаланган хорижлик фуқаролар ҳам ҳуқуқий оқибатларга дуч келиши мумкин.
Мигрантларга ўз ҳужжатларини расмийлаштиришда фақат қонуний йўллардан фойдаланиш ва ҳақиқий яшаш манзили бўйича рўйхатдан ўтиш тавсия этилади. Сохта рўйхатга олиш билан боғлиқ ҳолатлар текширувлар давомида аниқланганда, хорижликларнинг миграция мақоми қайта кўриб чиқилиши мумкин.
