Перм ўлкасида коллеж ходимларидан бири хорижликларнинг Россияда ноқонуний бўлишини ташкил этишда айбланиб, ҳибсга олинди. Тергов маълумотларига кўра, 46 ёшли ўқитувчи 2021-йилдан 2025-йилга қадар бўлган даврда ўқув юртининг расмий ҳужжатларига камида 5 нафар хорижлик талаба ҳақида ёлғон маълумотлар киритган.
Аниқланишича, ушбу хорижий фуқаролар дарсларга қатнашмаган, амалиётларни ўтамаган ва имтиҳонларни топширмаган. Шунга қарамай, уларнинг ҳужжатларига муваффақиятли баҳолар қўйилиб, ўқишни давом эттираётгани кўрсатилган. Аслида, бу шахслар ўқишдан четлаштирилиши ва Россия ҳудудида қонуний бўлиш ҳуқуқидан маҳрум этилиши керак бўлган.
Россия Тергов қўмитаси томонидан мазкур ҳолат юзасидан Россия Жиноят кодексининг 322.1-моддаси 3-қисми бўйича жиноят иши қўзғатилган. Гумонланувчининг яшаш жойи ва коллежда тинтувлар ўтказилиб, ҳужжатлар ҳамда электрон ахборот ташувчилар ашёвий далил сифатида олиб қўйилган.
Ҳозирги вақтда ҳуқуқ-тартибот органлари ушбу ноқонуний схемага алоқадор бошқа шахсларни аниқлаш бўйича тергов ҳаракатларини давом эттирмоқда. Айбланувчи суд қарори билан вақтинча сақлаш ҳибсхонасига жойлаштирилган.
