Россияда визасиз тартибда ишламоқчи бўлган Ўзбекистон фуқаролари учун патент олиш мажбурий жараён ҳисобланади. Ҳужжатларни Россияга кириб келган кундан бошлаб 30 календар кун ичида Россия ИИВнинг миграция масалалари бўйича бўлинмаларига ёки кўп функсияли марказларга (МФЦ) топшириш лозим. Асосий ҳужжатлар қаторига паспорт, миграция картаси, вақтинча турган жойи бўйича рўйхатдан ўтиш (регистрация), тиббий суғурта полиси, рус тили ва Россия қонунчилиги бўйича сертификат ҳамда тиббий кўрикдан ўтганлик ҳақидаги маълумотнома киради.
Тиббий кўрик аккредитациядан ўтган муассасаларда амалга оширилади ва у юқумли касалликлар, шунингдек, нарколог ва психиатр кўригини ўз ичига олади. Шунингдек, меҳнат мигрантлари рус тили, тарихи ва қонунчилиги бўйича имтиҳон топшириши шарт. Ўзбекистондаги махсус ўқув марказларида ушбу имтиҳонни олдиндан топшириб, сертификат олиш имконияти мавжуд, бу еса Россияда ҳужжатларни расмийлаштириш вақтини қисқартиради.
Патент 1 ойдан 12 ойгача бўлган муддатга берилади. Уни узайтириш учун ҳар ойда белгиланган миқдордаги солиқ тўловини (НДФЛ) ўз вақтида амалга ошириш кифоя. Тўлов кечиктирилган тақдирда патент бекор қилиниши мумкин. Шунингдек, патент олингандан сўнг 2 ой ичида иш берувчи билан меҳнат шартномаси тузиш ва бу ҳақда Россия ИИВни хабардор қилиш талаб етилади.
Миграция қонунчилигига риоя қилмаслик, жумладан, патентни ўз вақтида узайтирмаслик ёки тўловларни кечиктириш жарималарга, ҳужжатларнинг бекор қилинишига ва Россиядан чиқариб юборилишига олиб келиши мумкин. Қонуний ишлашни давом еттириш учун доимий равишда рўйхатдан ўтиш муддатини назорат қилиш ва фақат рухсат берилган ҳудудда меҳнат қилиш муҳимдир.
