Россия Давлат Думасида меҳнат мигрантлари ва хорижий мутахассислар учун касаллик варақаси бўйича тўловларни амалга оширишнинг янги тартиби муҳокама қилинмоқда. Давлат Думасининг Меҳнат, ижтимоий сиёсат ва фахрийлар ишлари бўйича қўмитаси аъзоси Светлана Бессарабнинг маълум қилишича, ушбу ўзгаришлар қонунчилик талабларини ягона стандартга келтиришни назарда тутади.
Янги ташаббусга кўра, хорижлик ишчилар вақтинчалик меҳнатга лаёқатсизлик нафақасини олиш ҳуқуқига фақатгина суғурта бадаллари тўланганидан кейин олти ой ўтгач эга бўлишлари мумкин. Ҳозирги кунда бундай чеклов мавжуд эмас ва ходим ишга жойлашиши биланоқ нафақа олиш имкониятига эга бўлиши мумкин.
Депутатнинг тушунтиришича, мазкур чора суғурта бадаллари миқдори тўланиши кутилаётган нафақа суммасига мутаносиб бўлишини таъминлаш мақсадида киритилмоқда. Шу билан бирга, хорижлик фуқаролар учун шошилинч тиббий ёрдам кўрсатиш тартиби ўзгаришсиз қолади, бироқ бошқа турдаги ижтимоий тўловларни олиш учун белгиланган муддат давомида ишлаш талаб этилади.
Ушбу ташаббус Россияда вақтинча бўлиб турган, шунингдек, вақтинча ёки доимий яшовчи барча тоифадаги хорижликлар учун тенг шароитлар яратишга қаратилгани таъкидланмоқда. Ҳозирча қонун лойиҳаси муҳокама босқичида бўлиб, унинг қачон кучга кириши ҳақида аниқ маълумот берилмаган.
