Москвадаги Гагарин туман суди Россия Халқлар дўстлиги университети (РУДН) қошидаги хорижлик фуқароларни тайёрлаш ва тестдан ўтказиш халқаро маркази директори ҳамда унинг ходимларига нисбатан очилган жиноят ишини кўриб чиқишни бошлади. Тергов маълумотларига кўра, 17 кишидан иборат гуруҳ 2021-йилдан 2024-йилга қадар мигрантларга рус тили, тарихи ва қонунчилиги бўйича сертификатларни ноқонуний йўл билан олишда кўмаклашган.
Жиноят иши материалларига кўра, айбланувчилар Москва, Перм ўлкаси, шунингдек, Москва, Тула, Самара ва Калуга вилоятларида фаолият юритган. Улар имтиҳон жараёнида хорижликларга тўғри жавобларни айтиб беришган ва видеокузатув тизимини ҳақиқий билим даражасини яшириш мақсадида сохталаштиришган. Ушбу схема орқали тахминан 500 нафар чет эл фуқароси патент, вақтинча яшаш рухсатномаси (РВП), яшаш гувоҳномаси (ВНЖ) ёки Россия фуқаролигини олиш учун зарур бўлган ҳужжатларга эга бўлган.
2026-йил июл ойида Пермдаги суд ушбу иш бўйича айби тасдиқланган бир неча шахсга, жумладан, марказнинг собиқ ходимига 7 йиллик қамоқ жазосини тайинлади. Ҳозирда Москвада марказ директори Максим Алексеев ва унинг бир гуруҳ ҳамкасблари устидан суд жараёни давом этмоқда. Уларга жиноий уюшма ташкил этиш ва ноқонуний миграцияни уюштириш айбловлари қўйилган.
Мутахассисларнинг таъкидлашича, Россияда ноқонуний миграцияни ташкил этиш бўйича жазо чоралари 2024-йилда кучайтирилган. Ушбу модда бўйича айбдор деб топилганлар 10 йилгача, жиноий уюшма ташкил этганлик учун эса 20 йилгача озодликдан маҳрум этилиши мумкин. Шунга ўхшаш ҳолатлар аввалроқ Екатеринбург, Омск ва Буюк Новгород шаҳarlaridagi таълим муассасаларида ҳам аниқланган.
