Россияда ўтказилаётган «Нелегал-2026» операцияси доирасида Смоленск вилояти полицияси ноқонуний миграцияни ташкил этиш ҳолатини аниқлади. Тергов маълумотларига кўра, 2022-йил январ ойида Рославл шаҳри фуқароси бўлган аёл хорижлик эркак билан тил бириктириб, унинг вояга етмаган қизига нисбатан сохта оталикни белгилаш учун ҳужжат топширган.
Аниқланишича, хорижлик фуқаро оила қуриш ёки болани тарбиялаш ниятида бўлмаган. У мазкур ҳаракатларни Россияда яшаш рухсатномасини (ВНЖ) соддалаштирилган тартибда олиш мақсадида амалга оширган. Аёл эса бунинг эвазига пул мукофоти олган. Ҳозирда ушбу ҳолат юзасидан Россия Жиноят кодексининг 322.1-моддаси 2-қисми билан жиноят иши қўзғатилган бўлиб, у 5 йилдан 10 йилгача озодликдан маҳрум қилиш жазосини назарда тутади.
Полиция ходимлари томонидан тўпланган ҳужжатлар судга юборилмоқда. Суд қарори билан оталик фактининг сохталиги тасдиқлангач, фуқаролик ҳолати далолатномаси ёзуви бекор қилинади. Шундан сўнг, хорижлик фуқарога аввал берилган яшаш рухсатномаси ҳам ўз кучини йўқотади.
Айни пайтда аёлга нисбатан яшаш жойидан кетмаслик ҳақида тилхат олинган, сохта «ота»нинг қаердалиги аниқланмоқда. Ҳуқуқ-тартибот органлари ноқонуний миграцияга қарши профилактик тадбирларни давом эттирмоқда.
