Татаристон Республикаси Фан ва таълим вазирлиги, миграция хизмати ҳамда Хорижлик фуқароларни мослаштириш маркази таълим муассасаларида таҳсил олаётган хорижлик ўқувчилар билан ишлашнинг ягона алгоритмини тасдиқлади. Ушбу ташаббус мактаб ва олий ўқув юртларида хорижликлар учун ўқув жараёнини тартибга солишга қаратилган.
Ўтказилган йиғилишда хорижлик фуқароларни таълим ташкилотларига қабул қилиш қоидалари ва бунинг учун талаб этиладиган ҳужжатлар рўйхати қайта кўриб чиқилди. Шунингдек, ўқувчи-мигрантларнинг тил ўрганиши ҳамда ижтимоий муҳитга мослашишини ташкил этиш масалалари муҳокама қилинди.
Мутасаддилар таълим муассасаларида хорижлик ўқувчилар билан ишлаш жараёнида юзага келадиган одатий қийинчиликлар ва уларни бартараф этиш йўлларини ҳам таҳлил қилишди. Мазкур йиғилишда туман таълим бошқармалари раҳбарлари, ўқув юртлари директорлари ҳамда Россия ИИВнинг Татаристон бўйича миграция масалалари бошқармаси вакиллари иштирок этди.
Ушбу янги тартиб хорижлик ўқувчиларнинг таълим олиш жараёнини енгиллаштириш ва ҳужжатларни расмийлаштиришдаги тушунмовчиликларнинг олдини олишга хизмат қилиши кутилмоқда. Ўқувчилар ва уларнинг ота-оналари ўқишга кириш учун керакли ҳужжатлар рўйхати ҳақида ўзлари таълим олаётган ёки ҳужжат топшираётган муассаса маъмуриятидан аниқ маълумот олишлари тавсия этилади.
