Чувашистон Республикасининг Новочебоксарск шаҳрида 25 ёшли хорижлик фуқаро фирибгарликда гумонланиб қўлга олинди. Тергов маълумотларига кўра, у ижарага олинган “КамАЗ” юк машинасини сотиш учун жазони ижро этиш хизмати (ФСИН) ходими формасини кийиб, ўзини давлат хизматчиси сифатида кўрсатган.
Воқеа 12-октябр куни бошланган. Гумонланувчи юк машинаси эгасига транспорт воситасини колониядаги ишлар учун ижарага олмоқчи эканлигини айтиб, ишончига кирган. Машина эгаси билан келишувга кўра, у транспортни текширув учун Новочебоксарск шаҳридаги тўхташ жойига олиб келган ва олдиндан тўлов қилиб, машина калитларини қўлга киритган. Кейинчалик у машинани 1 миллион 900 минг рубл эвазига бошқа шахсга сотиб юборган.
Машина эгаси ГПС-кузатув иловаси орқали транспортнинг бошқа ҳудудга кетаётганини пайқаб, полицияга мурожаат қилган ва машинани Марий Эл ҳудудидаги ёқилғи қуйиш шохобчасида топган. У ерда машинани сотиб олган шахс ҳам алданганини тушунган. Гумонланувчи эса шаҳарни тарк этмоқчи бўлган вақтда ҳуқуқ-тартибот органлари томонидан қўлга олинган.
25 ёшли йигит ўз айбига иқрор бўлиб, жиноятни мессенжер орқали боғланган “куратор” кўрсатмаси билан амалга оширганини маълум қилган. У қўлга киритилган 1 миллион 900 минг рублни курьерга топширганини билдирган. Ҳозирда унга нисбатан Россия Жиноят кодексининг 159-моддаси 4-қисми билан жиноят иши қўзғатилган, шунингдек, миграция қонунчилигини бузгани учун маъмурий материаллар расмийлаштирилган.
