Омск вилояти ИИБ наркотикларни назорат қилиш бошқармаси ходимлари томонидан ўтказилган тезкор тадбир давомида 25 ёшли Марказий Осиё фуқароси қўлга олинди. У шаҳар ҳудудида гиёҳванд моддаларни яширин жойларга (закладка) жойлаштириш орқали сотиш билан шуғулланганликда гумон қилинмоқда.
Аниқланишича, гумонланувчи Омскга бир ой аввал келган. Тергов маълумотларига кўра, у мессенжер орқали танишган шахснинг таклифи билан ноқонуний фаолиятга киришган. У Любинский туманидан олдиндан қадоқланган гиёҳванд моддаларни олиб, шаҳарнинг турли ҳудудларига тарқатиб келган. Охирги партия 200 та ўрамдан иборат бўлган.
Шахсий тинтув вақтида гумонланувчидан 179 та ўрамдаги кукунсимон модда топилган. Экспертиза хулосасига кўра, ушбу моддалар жами 0,3 граммдан бўлган метадон экани аниқланган.
Россия ИИВнинг Омск шаҳри бўйича 8-сонли полиция бўлими терговчиси томонидан жиноят кодексининг 30-моддаси 3-қисми ва 228.1-моддаси 4-қисми (гиёҳванд моддаларни йирик миқдорда сотишга уриниш) билан жиноят иши қўзғатилди. Омск шаҳри Совет туман суди қарори билан гумонланувчига нисбатан қамоққа олиш тарзидаги эҳтиёт чораси танланди.
