Россиянинг Подмосковье (Москва вилояти) ҳудудида ўз турмуш ўртоғини аёвсиз калтаклаб, ўлимга сабабчи бўлган Ўзбекистон фуқаросига нисбатан суд ҳукми ўқилди.
Пушкин шаҳар суди 32 ёшли Журабек Шукуровни Жиноят кодексининг тегишли моддаси билан айбдор деб топди.
Тергов ва суд материалларига кўра, воқеа 2026-йилнинг март ойида содир бўлган. Спиртли ичимликлар таъсирида бўлган Ж. Шукуров оилавий низо оқибатида аёлига оғир тан жароҳатлари етказган. Тиббий экспертиза хулосасига кўра, жабрланувчининг ҳаётий муҳим аъзоларига, хусусан жигарига етказилган оғир шикастланишлар ўлимга олиб келган.
Судланувчи жиноятни яшириш мақсадида марҳуманинг майитини маиший чиқиндилар ташланадиган жойга ташлаб юборган. Жасад кейинчалик коммунал соҳа ходимлари томонидан топилган.
Суд ҳукми ва модданинг ўзгартирилиши Дастлаб ҳолат юзасидан қотиллик (РФ ЖКнинг 105-моддаси) бўйича жиноий иш очилиши кутилган эди. Бироқ якунда суд бу ҳолатни РФ Жиноят кодексининг 111-моддаси 4-қисми (эҳтиётсизлик орқасида ўлимга сабаб бўлган қасддан баданга оғир шикаст етказиш) бўйича кўриб чиқди.
Мазкур модда асосида Пушкин шаҳар суди Журабек Шукуровни 8 йил муддатга озодликдан маҳрум қилиш жазосига ҳукм этди. Ҳукм қонуний кучга кириши ва жазони ўташ тартиби белгиланиши кутилмоқда.
