Мордовия Республикаси Саранск шаҳрида 30 ёшли чет эл фуқароси ҳуқуқ-тартибот идоралари ходимига пора беришга урингани учун бир йил муддатга озодликдан маҳрум этилди. Суд ҳукмига кўра, у жазони умумий тартибли колонияда ўтайди.
Воқеа 2026-йилнинг июн ойида Саранскдаги Победа кўчасида жойлашган қурилиш объектларидан бирида ўтказилган рейд давомида юз берган. Текширув жараёнида ушбу шахс Россия ҳудудида ноқонуний бўлиб тургани ва тегишли рухсатномасиз меҳнат фаолияти билан шуғулланаётгани аниқланган.
Маъмурий жавобгарликдан қочиш мақсадида мигрант Россия ИИВ Миграция масалалари бошқармаси ходимига 60 минг рубл миқдорида пора таклиф қилган. Полициячи бу таклифни рад этиб, дарҳол навбатчилик қисмига хабар берган. Шундан сўнг, ҳуқуқни муҳофаза қилувчи органлар томонидан тезкор тадбир ўтказилган.
Эртаси куни мигрант 25 минг рубл миқдоридаги пулни пора сифатида топширишга уринаётган вақтда Россия Федерал хавфсизлик хизмати (ФСБ) ходимлари томонидан қўлга олинган. Мазкур ҳолат юзасидан Россия Федерацияси Жиноят кодексининг 291-моддаси 3-қисми (пора беришга уриниш) бўйича жиноят иши қўзғатилган ва суд жараёни якунланган.
