Москва суди 19 ёшли қизга жинсий зўравонлик қилишга уринган 32 ёшли Ўзбекистон фуқаросини 8 йилга озодликдан маҳрум қилди.
Ҳодиса шу йилнинг май ойида Россия пойтахти шимоли-шарқидаги “Яуза” боғида содир бўлган. Кинодан қайтаётган ва қулоқчин тақиб олган қиз ортидан эркак яқинлашиб келаётганини сезмай қолган. Судланувчи жабрланувчига шиддат билан тегажоғлик қилиб, уни бутазор ичига судраб киришга уринган.
Қизнинг ёрдам сўраб чинқирган овозини шу атрофдаги икки нафар йўловчи эшитиб қолган. Улар зудлик билан аралашиб, ҳужумчини воқеа жойида қўлга олишган ва полицияга топширишган. Қутқарувчилардан бирининг айтишича, бундан 20 йил аввал худди шундай вазиятда дўстининг турмуш ўртоғи боғда ҳужумга учраб, ҳеч ким ёрдам бермагани сабабли ҳалок бўлган экан. Шу боис у бу сафар иккиланиб ўтирмай ёрдамга шошилган.
Тергов давомида гумонланувчи ўз айбини инкор этди. У бир неча банка пиво ичгани, ётоқхона ёпилишидан олдин улгуролмагани учун боғдаги скамейкада тунаб қолмоқчи бўлганини даъво қилди. Унинг сўзларига кўра, у қиздан фақатгина метрога борадиган йўлни сўрамоқчи бўлган. Бироқ жабрланувчи ва икки гувоҳнинг кўрсатмалари бу версияни бутунлай рад этди.
Москванинг Бабушкинский суди мазкур шахсни жинсий хусусиятдаги зўравонлик ҳаракатларини содир этишга уринишда айбдор деб топди ва унга нисбатан умумий тартибли колонияда 8 йил муддатга озодликдан маҳрум қилиш жазосини тайинлади.
