Татаристондаги воқеада жабрланган ўзбекистонликлар Ватанга қайтарилди
Жорий йилнинг 10-август куни Татаристоннинг Нижнекамск шаҳрида содир бўлган дрон ҳужуми оқибатида бир гуруҳ Ўзбекистон фуқаролари тан жароҳати олган эди. Мазкур воқеа муносабати билан Ўзбекистоннинг Қозон шаҳридаги Бош консулхонаси, Миграция агентлигининг Россиядаги ваколатхонаси ҳамда «Uzbekistan Airways» авиакомпанияси ҳамкорлигида жабрланганларга зарур ёрдам кўрсатилди.
Жумладан, оғир тан жароҳати олиб, маҳаллий шифохоналарда даволанган, жумладан, мураккаб жарроҳлик амалиётларини бошдан кечирган юртдошларимизнинг ҳолати барқарорлашгач, улар тиббий эвакуация тартибида Ўзбекистонга қайтарилди. Охирги жабрланган фуқаро ҳам «Қозон–Тошкент» йўналиши бўйича Ватанга етказилиб, даволаниш жараёнини давом эттириши учун шароит яратилди.
Расмий маълумотларга кўра, айни пайтда жабрланган ҳамкасбларимизга Россия Федерацияси қонунчилигида белгиланган тартибда компенсация маблағларини олиш учун зарур ҳужжатларни расмийлаштириш ва тегишли ташкилотларга тақдим этиш масалалари назоратга олинган.
Чет элда меҳнат фаолиятини амалга ошириш даврида турли фавқулодда вазиятларга тушиб қолган фуқаролар Миграция агентлигининг 1282 қисқа рақамли ишонч телефони ёки @huquqiyyordamuzbot Telegram боти орқали 24/7 режимида ҳуқуқий ёрдам олишлари мумкин.
