Ўзбекистон Республикасининг 33 ёшли фуқароси кечки овқат тайёрланмагани бўйича келиб чиққан жанжал оқибатида ўзининг 48 ёшли ҳамюртини пичоқлаб ўлдирди. Эркаклар Юрьеветсдаги корхоналардан бирида меҳнат қилишган бўлиб, иш берувчи улар учун дам олиш ва овқатланиш хонасини ташкил қилиб берган эди.
Вилоят прокуратураси хабарига кўра, 2026-йил 19-июн куни кечқурун, ишдан ташқари вақтда, айбланувчи ва ўзини гуруҳда ёши катта деб ҳисоблаган 48 ёшли муҳожир ўртасида низо келиб чиққан. Ёши катта эркак ўша куни ошхонада навбатчи бўлган ёш йигитга кечки овқатни тайёрламагани учун эътироз билдирган.
Владимир вилояти Тергов қўмитасининг маълум қилишича, оғзаки жанжал муштлашувга айланиб кетган. Жанжал жараёнида айбдор ошхона пичоғини олиб, жабрланувчининг қорин қисмига зарба берган. Хонада бўлган бошқа ишчилар уларни ажратишга уриниб, тез ёрдам чақиришган. Бироқ жабрланувчи олган оғир жароҳатлари оқибатида воқеа жойида вафот этган.
Айбланувчи ўз айбига қисман иқрор бўлди. Унинг таъкидлашича, танишини ўлдириш нияти бўлмаган. Ҳозирда мазкур жиноят иши кўриб чиқиш учун Владимир шаҳрининг Ленинский туман судига юборилди.
Ҳамюртини ўлдирган шахсга 15 йилгача бўлган муддатга озодликдан маҳрум қилиш жазоси тайинланиши мумкин.
