Москва ва Москва вилоятида истиқомат қилувчи хорижлик фуқаролар “Амина” иловасининг ишлашида 2-3 кундан буён оммавий носозликлар кузатилаётганидан шикоят қилмоқда. Фойдаланувчиларнинг маълум қилишича, илова мобил интернет орқали умуман ишламаяпти, айрим ҳолларда эса фақат Wi-Fi тармоғи орқали кириш имкони бўлмоқда. Муаммолар T2, МТС ва “Билайн” каби турли алоқа операторлари абонентларида қайд этилган.
Илова ишлаб чиқувчилари носозликларнинг сабаблари ва уларни бартараф этиш муддатлари бўйича ҳозирча расмий изоҳ бермади. 1-сентябрда янгиланган 2.6.1 версияси ҳам тизимдаги хатоликларни бартараф этишга ёрдам бермаган. Эслатиб ўтамиз, 2026-йил 1-сентябрдан бошлаб иловадан фойдаланиши шарт бўлган шахслар доираси кенгайтирилган эди.
Ушбу вазият мигрантлар учун жиддий хавф туғдиради, чунки хорижликлар ўз турган жойи ҳақидаги маълумотларни Россия ИИВга айнан шу илова орқали юборишлари шарт. Қоидаларга кўра, агар илова 3 иш кунидан ортиқ вақт давомида жойлашув ҳақидаги маълумотларни юбормаса, фойдаланувчи миграция ҳисобидан автоматик тарзда чиқариб ташланиши мумкин.
Шу сабабли, мигрантларга ўз профилларида жойлашув маълумотлари муваффақиятли юборилаётганини диққат билан кузатиб бориш тавсия этилади. Илгари, 2026-йил июн ва июл ойларида ҳам илова фаолиятида шунга ўхшаш носозликлар кузатилган эди.
