Курск вилояти губернатори минтақада патент асосида ишлаётган хорижлик фуқаролар учун солиқ юкини ошириш ташаббуси билан чиқди. Бу ўзгариш меҳнат патенти қийматига бевосита таъсир кўрсатадиган минтақавий дефлятор коэффициентини қайта кўриб чиқишни назарда тутади.
Маълумот учун, хорижлик ишчилар даромад солиғини (НДФЛ) белгиланган аванс тўловлари кўринишида тўлайди. Бунда 1200 рубль миқдоридаги базавий ҳисоб-китоб суммаси ҳар йили маҳаллий меҳнат бозори ва инфляция даражасига қараб индексация қилинадиган минтақавий коэффициентга кўпайтирилади.
2025-йилда Курск вилоятида ушбу коэффициент 2,92 даражасида белгиланган бўлса, 2026-йил учун уни 3,07 га, 2027-йилга келиб эса 3,4217 га етказиш режалаштирилмоқда. Минтақа ҳукумати ушбу қарорни нархлар ўсиши прогнози ва маҳаллий бюджет балансини сақлаш зарурати билан изоҳламоқда.
Курск вилояти Думаси вакилларининг таъкидлашича, агар янги коэффициент ўз вақтида тасдиқланмаса, у автоматик равишда бирга тенглашиб қолади. Бу эса минтақа бюджетига тушумнинг тахминан 238,7 миллион рублга камайишига олиб келиши мумкин.
Патент қийматини ошириш бўйича якуний қарор яқин вақт ичида Курск вилояти Думаси депутатлари томонидан қабул қилинади.
