Россия Давлат Думаси 2027-йилги федерал бюджет лойиҳасини биринчи ўқишда кўриб чиқди. Ҳужжатни қабул қилиш жараёни парламентда қизғин баҳсларга сабаб бўлди: 372 депутат ёқлаб овоз берган бўлса, 51 нафари бетараф қолди. Бюджет лойиҳасига кўра, мамлакат хазинасида 5,5 триллион рубл миқдорида дефицит (даромад ва харажат ўртасидаги фарқ) кутилмоқда, бу мамлакат ялпи ички маҳсулотининг 2,2 фоизини ташкил этади.
Россия молия вазири Антон Силуановнинг таъкидлашича, бюджет ташқи иқтисодий чақириқларга чидамли бўлиб, барча ижтимоий мажбуриятларни бажаришни кафолатлайди. Хусусан, 2027–2029-йилларда болаларни тарбиялаш учун мўлжалланган ойлик нафақалар 7,8 миллион оилага ажратилиши режалаштирилган. Шунингдек, она капитали 1,9 миллиондан ортиқ оилага, оилавий тўловлар эса 2 миллиондан ортиқ ота-онага ҳар йили тақдим этилиши кўзда тутилган.
Депутатлар ўртасидаги баҳсларда солиқ юкламалари масаласи ҳам кўтарилди. Айрим сиёсий партиялар вакиллари солиқлар ва божхона йиғимларининг оширилиши хавфидан огоҳлантириб, харажатларни оптималлаштириш зарурлигини таъкидлашди. Хусусан, электрон савдо ва хорижий посилкалар учун қўшилган қиймат солиғи (НДС) ҳамда мулк солиғининг оширилиши танқидий муҳокама қилинди.
Бюджет лойиҳаси бўйича якуний қарор иккинчи ўқишда қабул қилинади. Ҳукумат вакиллари депутатларнинг таклифларини ўрганиб чиқиш ва бюджет устуворликларини аниқлаштириш бўйича ишларни давом эттиришини маълум қилди. Мигрантлар ва хорижий ишчилар учун ушбу бюджет сиёсати иқтисодий барқарорлик ва солиқ қонунчилигидаги ўзгаришлар орқали билвосита таъсир кўрсатиши мумкин.
