Россия иш ва ўқиш мақсадида келаётган чет эл фуқароларини мамнуният билан кутиб олади, деди Мария Захарова.
Россия Ташқи ишлар вазирлиги расмий вакили Мария Захарованинг 16-сентябрь куни маълум қилишича, мамлакат ишлаш ёки ўқиш учун келган хорижликлар учун қонуний бўлишнинг содда ва тушунарли қоидаларини жорий этмоқда. Унинг сўзларига кўра, маъмурий тартиб-таомилларни енгиллаштириш ва рақамли сервислар орқали иш жараёнларини шаффофлаштириш ҳамда иш берувчиларнинг ноқонуний схемаларидан ҳимоя қилиш чоралари кўрилмоқда.
Шу билан бирга, Россияда миграция қонунчилиги назорати кучайиб бормоқда. Хусусан, 1-сентябрдан бошлаб Россияда уч ойдан ортиқ бўлиб турган хорижликлар учун мажбурий тиббий кўрикдан ўтиш муддати 90 кундан 30 кунгача қисқартирилди. Бу мигрантлардан ҳужжатларни расмийлаштиришда тезкорликни талаб қилади.
Бундан ташқари, 2027-йил 1-январдан бошлаб меҳнат мигрантлари учун янги молиявий мажбурият жорий этилиши кутилмоқда. Ички ишлар вазирлиги Миграция хизмати бошлиғи Андрей Кикотнинг 10-сентябрдаги баёнотига кўра, ишлаётган мигрантлар Россияда яшаётган ҳар бир ишламайдиган оила аъзоси учун солиқ тўлашлари шарт бўлади. Ушбу чора оила аъзоларининг мамлакатда бўлишини чеклаш мақсадида ишлаб чиқилган давлат миграция сиёсати концепцияси доирасида амалга оширилмоқда.
