Россия Рақамли ривожланиш вазирлиги (Минцифры) маълумотларига кўра, хориждан олиб келинган ва божхона назоратидан ўтмаган смартфонлар учун IMEI кодини мажбурий рўйхатдан ўтказиш тартиби жорий этилиши кутилмоқда. Ушбу қоида чет элдан шахсан телефон олиб келган ёки контрафакт қурилма сотиб олган шахсларга тааллуқли бўлади.
Белгиланган муддат ичида рўйхатдан ўтишдан бош тортган қурилмалар Россия мобил алоқа тармоқларида хизмат кўрсатишдан узилади. Қурилмани «Госуслуги» портали орқали икки ҳафта ичида рўйхатдан ўтказиш имконияти яратилади. 2027-йил апрел ойига қадар Россия тармоқларида ишлаб турган барча қурилмалар рўйхатдан ўтишдан қатъи назар, ўз иш фаолиятини давом эттиради. Расмий савдо нуқталаридан харид қилинган техникалар эса базага автоматик тарзда киритилади.
Экспертларнинг баҳолашича, ушбу чора «кулранг» импорт билан шуғулланувчи сотувчиларнинг 70 фоизигача бозорини тарк этишига ва айрим смартфон моделлари нархининг 40 фоизгача қимматлашишига олиб келиши мумкин.
Шунингдек, Россияда мобил рақамлар бўйича ҳам янги чекловлар амал қилмоқда. 2025-йил 1-ноябрдан бошлаб хорижлик фуқаролар учун барча операторлар ҳисобига жами 10 та рақам расмийлаштириш лимити белгиланган. Ушбу лимитдан ортиқча рақамларга эга фойдаланувчиларнинг SIM-карталари блокланиши мумкин.
