Саратов вилояти маъмурияти хорижий ишчи кучидан фойдаланиш бўйича янги қоидаларни тасдиқлаш арафасида. 2027-йил 1-январдан бошлаб минтақада патент билан ишловчи мигрантлар учун ўнта янги иқтисодий фаолият тури тақиқланиши режалаштирилмоқда. Тегишли хулоса Иқтисодий ривожланиш вазирлиги томонидан имзоланган бўлиб, якуний қарор вилоят губернатори томонидан қабул қилиниши кутилмоқда.
Янги чекловлар асосан ҳаётий муҳим инфратузилма соҳаларини қамраб олади. Хусусан, электр энергияси, газ ва буғ билан таъминлаш, сув таъминоти ва сув чиқариш тизимлари, шунингдек, юк ташиш хизматларида хорижликларнинг ишлашига рухсат берилмайди. Аввалроқ минтақада йўловчи ташиш, такси, курьерлик, умумий овқатланиш, таълим, соғлиқни сақлаш ва давлат бошқаруви органларида ҳам шунга ўхшаш тақиқлар жорий этилган эди.
Вилоят Меҳнат ва ижтимоий ҳимоя вазирлиги ушбу чоралар минтақа иқтисодиётига салбий таъсир кўрсатмаслигини ва маҳаллий аҳолининг бандлигини таъминлашга ёрдам беришини таъкидламоқда. Расмийларнинг фикрича, бу қадамлар жамоат хавфсизлигини таъминлаш мақсадида амалга оширилмоқда.
Иш берувчиларга ўз штат жадвалини янги талабларга мослаштириш учун 2027-йил 1-январгача вақт берилган. Ушбу давр мобайнида корхоналар ходимларни қайта кўриб чиқишлари ва янги қоидаларга мувофиқ иш жараёнларини ташкил этишлари талаб этилади.
