Ўзбекистон Бандлик ва камбағалликни қисқартириш вазири Ботир Зоҳидовнинг маълум қилишича, хориждаги меҳнат фаолиятини якунлаб, юртга қайтган фуқаролар сони 661 минг нафарни ташкил этади. Ушбу фуқароларнинг ижтимоий-иқтисодий мослашуви ва уларни иш билан таъминлаш масаласи давлат назоратида бўлиб турибди.
Статистик маълумотларга кўра, қайтган фуқароларнинг 557 минг нафари ҳозирги кунда доимий даромад келтирадиган иш ўринларига жойлаштирилган. Бу чора-тадбирлар мигрантларнинг Ўзбекистон меҳнат бозорига қайта интеграциялашувини тезлаштиришга қаратилган.
Шунингдек, вазирлик томонидан яна 70 минг нафар мигрантни иш билан таъминлаш бўйича ишлар давом эттирилмоқда. Бунда фуқароларнинг шахсий хоҳиш-истаклари, касбий маҳорати ва қизиқишлари инобатга олинаётгани таъкидланган.
