Югра (Ханти-Мансийск автоном округи) ҳукумати 2027-2029 йилларга мўлжалланган солиқ ва бюджет сиёсати лойиҳасига кўра, меҳнат мигрантлари учун патент нархини оширишни таклиф қилди. Минтақавий коэффициентни 4,284 дан 5,445 гача, яъни 27 фоиздан кўпроққа кўтариш режалаштирилмоқда. Молия департаменти ушбу ташаббусни хорижлик ишчиларнинг солиқ юкини Россия фуқаролари тўлайдиган 13 фоизлик даромад солиғи ставкасига яқинлаштириш зарурати билан изоҳламоқда.
Таъкидлаш жоизки, Юграда патент нархи кетма-кет иккинчи йил оширилмоқда. 2026-йил учун коэффициент 3,565 дан 4,284 гача кўтарилган эди, бунинг натижасида ойлик тўлов 14 004 рублни ташкил этган. Минтақа расмийлари ушбу чорани, биринчи навбатда, иш ҳақи юқори бўлган қурилиш ва фойдали қазилмаларни қазиб олиш соҳаларига қаратилган деб ҳисобламоқда. Ушбу ўзгаришлар орқали бюджетга қўшимча 1,6 миллиард рубл тушум тушиши кутилмоқда.
Солиштириш учун, қўшни Тюмен вилоятида 2026-йил учун коэффициент 3,425 даражасида белгиланган бўлиб, патент қиймати ойига 11 471 рублни ташкил этади. Бу Юградаги кўрсаткичдан қарийб 2,5 минг рублга арзонроқдир.
Эслатиб ўтамиз, Югра ҳукумати 2026-йил 1-январдан бошлаб патент асосида ишлайдиган хорижликлар учун яна бешта соҳада, жумладан, курьерлик фаолиятида ишлашни тақиқлаган эди. Faktologia.com маълумотларига кўра, солиқ юкининг ошиши минтақадан хорижлик ишчиларнинг чиқиб кетишига ва айрим муниципалитетлар, хусусан, Сургут бюджети даромадларининг камайишига олиб келмоқда.
