Иркутскда 3 нафар хорижлик миграция қоидалари бузилгани учун жавобгарликка тортилди
Иркутск вилоятида ҳуқуқ-тартибот органлари ходимлари томонидан миграция қонунчилигига риоя этилишини назорат қилиш бўйича навбатдаги рейдлар ўтказилди. Тадбирда Россия ИИВнинг минтақавий бошқармаси, миграция масалалари бўлими ҳамда Россия гвардияси вакиллари иштирок этди.
Текширувлар асосан шаҳар ҳудудидаги мева-сабзавот базалари ва бир нечта умумий овқатланиш шохобчаларида амалга оширилди. Рейднинг асосий мақсади ноқонуний миграция каналларини аниқлаш ва уларнинг олдини олишдан иборат бўлган.
Текширув жараёнида миграция қонунчилигини бузган 3 нафар шахс аниқланди. Улар Россия Федерацияси Маъмурий ҳуқуқбузарликлар тўғрисидаги кодексининг 19.27-моддасига (миграция ҳисобини амалга оширишда ёлғон маълумотлар тақдим этиш) асосан жавобгарликка тортилди.
Полиция ходимлари томонидан аниқланган ҳолатлар бўйича суриштирув ишлари олиб борилмоқда. Текширув якунлари бўйича Россия қонунчилигига мувофиқ тегишли қарорлар қабул қилинади. Минтақада бундай профилактик тадбирлар доимий асосда ўтказиб келинмоқда.
