Магадан шаҳрида ҳуқуқ-тартибот органлари ходимлари кўча можароларини келтириб чиқарган ва фуқароларга ҳужум қилган шахсни қўлга олди. Россия ИИВнинг Магадан шаҳри бўйича бўлими маълумотларига кўра, гумонланувчи 49 ёшли маҳаллий фуқаро бўлиб чиқди.
Воқеа август ойи бошида хорижлик фуқаронинг қовурғалари синган ҳолда шифохонага ётқизилиши ортидан фош бўлди. Полиция суриштируви давомида ушбу тан жароҳати миллий адоват заминида етказилгани аниқланди. Россия Миллий гвардияси кўмагида ўтказилган тезкор тадбир давомида гумонланувчининг уйи ва автомобилидан газ баллончалари ҳамда бошқа ашёвий далиллар топилган.
Тергов ҳаракатлари давомида ушбу шахснинг яна камида учта ҳужумда иштироки борлиги маълум бўлди. Хусусан, у жорий йилнинг феврал ва апрел ойларида кўчада бегона шахслар, жумладан, аёл киши ва кекса ёшли фуқарога нисбатан куч ишлатган. Жабрланувчиларнинг аксарияти ўз вақтида ички ишлар органларига мурожаат қилмаган.
Россия Жиноят кодексининг 112 ва 213-моддалари бўйича жиноят ишлари қўзғатилиб, гумонланувчи вақтинча сақлаш ҳибсхонасига жойлаштирилди. Ҳозирда ҳуқуқ-тартибот идоралари унинг ҳудуддаги бошқа шунга ўхшаш жиноятларга алоқадорлигини текширмоқда.
Полиция мазкур шахснинг хатти-ҳаракатларидан жабр кўрган, аммо ҳуқуқни муҳофаза қилувчи органларга мурожаат қилмаган фуқаролардан 102 рақами орқали хабар беришни сўрамоқда.
