Москва шаҳар Транспорт департаменти маълумотига кўра, 2026-йил 15-октябрдан бошлаб пойтахтдаги курьерлик хизматлари йўл ҳаракати қоидалари (ЙҲҚ) ва иш стандартлари бўйича тестдан ўтмаган ходимларни буюртмаларни етказиб бериш жараёнига киритмайди. Ушбу янгилик шаҳардаги 135 мингдан ортиқ курьерларга тааллуқли бўлиб, уларнинг хавфсизлигини таъминлаш ва йўллардаги тартибни кучайтириш мақсадида жорий этилмоқда.
Тест синовлари КИС «АРТ» тизими орқали амалга оширилади. Курьерлар тест давомида хавфсиз ҳайдаш қоидалари, жумладан, тезлик режими, велосипед ва шахсий ҳаракатланиш воситаларини (СИМ) бошқариш ҳамда пиёдалар ўтиш жойларида транспортдан тушиш тартиблари бўйича билимларини намойиш этишлари керак. Шунингдек, тест саволлари иш сменасини очиш, ташқи кўриниш, сумка ва транспорт воситаларига қўйиладиган талаблар ҳамда хизмат кўрсатиш этикаси каби мавзуларни ҳам қамраб олади.
Имтиҳондан муваффақиятли ўтиш учун саволларнинг камида 80 фоизига тўғри жавоб бериш талаб этилади. Натижалар курьернинг шахсий кабинетида дарҳол акс этади ва бир йил давомида амал қилади. 30-сентябрдан бошлаб курьерлар ихтиёрий равишда тест топширишни бошлашган бўлса, 15-октябрдан эътиборан бу жараён барча учун мажбурий ҳисобланади.
Расмийларнинг таъкидлашича, ушбу тизим аввалроқ такси ҳайдовчилари учун жорий этилган ва ўз самарасини берган. Эндиликда худди шундай назорат механизми етказиб бериш хизмати ходимлари учун ҳам йўлга қўйилмоқда. Курьерларга ўз вақтида тестдан ўтиб, иш фаолиятини узлуксиз давом эттириш тавсия этилади.
