Россия ИИВнинг Санкт-Петербург ва Ленинград вилояти бўйича бош бошқармаси ходимлари Ломоносов туманидаги Новоселье ҳудудида жойлашган қурилиш объектида текширув ўтказди. Миграция масалалари бошқармаси ва полиция махсус полки томонидан ташкил этилган рейд давомида жами 123 нафар хорижлик фуқаронинг ҳужжатлари текширувдан ўтказилди.
Текширув натижаларига кўра, мигрантларнинг қарийб ярмида қонунбузарликлар аниқланган. Хусусан, 47 нафар шахс патентда кўрсатилган ҳудуддан ташқарида ишлагани, яна 10 нафар хорижлик эса умуман рухсатнома ҳужжатларисиз меҳнат фаолиятини юритаётгани маълум бўлди. Қоидабузарлик содир этган барча 57 нафар шахс ҳолатни аниқлаштириш учун ҳудудий полиция бўлимларига олиб кетилди.
Шунингдек, ушбу хорижликларни қонун талабларига зид равишда иш билан таъминлаган иш берувчига нисбатан ҳам текширув ишлари бошланди. Ҳозирда ҳуқуқ-тартибот идоралари томонидан барча ҳолатлар ўрганилмоқда ва иш берувчининг жавобгарлик масаласи ҳал этилмоқда.
Миграция қонунчилигига риоя этилишини назорат қилиш мақсадида бундай рейдлар мунтазам равишда ўтказиб келинмоқда. Ишчилар ўзларига тегишли патентларнинг амал қилиш ҳудудини ва ҳужжатларнинг ҳақиқийлигини олдиндан текшириб олишлари тавсия этилади.
