Россияга келган муҳожирлар учун тиббий кўрик муддати 30 кунгача қисқартирилди

Россия Федерациясида миграция сиёсатини такомиллаштиришга қаратилган янги федерал қонун сентябрь ойидан эътиборан кучга кирди. Ушбу ўзгаришларга кўра, Россияга уч ойдан ортиқ муддатга келган хорижий фуқаролар мамлакатга кириб келганидан сўнг 30 кун ичида тиббий кўрикдан ўтишлари мажбурий этиб белгиланди. Аввал бу муддат 90 кунни ташкил этган.

Янги қоидалар хорижликларнинг соғлиғини назорат қилишни кучайтиришни кўзда тутади. Хусусан, тиббий кўрикдан бўйин товлаганлар учун маъмурий жавобгарлик жорий этилди. Шунингдек, юқумли касалликлар йўқлиги тўғрисидаги тиббий маълумотномаларни қалбакилаштириш ва уларнинг айланмаси учун жиноий жавобгарлик чоралари кучайтирилди. Расмийларнинг таъкидлашича, ушбу чоралар хавфли инфекциялар аниқланганда мигрантларни тезкор равишда мамлакатдан чиқариб юбориш имконини беради.

Россия ИИВ маълумотларига кўра, 2026-йилнинг биринчи ярмида қонунчиликни бузганлиги учун қарийб 100 минг нафар муҳожир Россиядан чиқариб юборилган ва депортация қилинган. Шунингдек, 200 минг нафар хорижий фуқаронинг мамлакатга кириши тақиқланган, 800 мингга яқин шахс эса назорат остидаги шахслар реестрига киритилган.

2024-йилдан буён Россия Давлат думаси миграция соҳасида 32 та федерал қонунни қабул қилди. Ушбу қонунлар ҳуқуқни муҳофаза қилувчи органларнинг ноқонуний миграцияга қарши курашиш имкониятларини кенгайтиришга қаратилган.