Санкт-Петербург ва Ленинград вилояти бўйича Россия ИИВ бош бошқармаси ходимлари Приморск туманидаги қурилиш майдончаларида навбатдаги профилактик тадбирларни амалга оширди. Плесецкая кўчасида жойлашган тўртта объектда ўтказилган рейд давомида жами 617 нафар шахс текширувдан ўтказилди.
Расмий маълумотларга кўра, текширилганларнинг 514 нафари хорижий давлат фуқаролари бўлган. Рейд натижасида миграция қонунчилигини бузганлик аломатлари аниқланган 6 нафар хорижлик полиция бўлимига олиб кетилди. Уларга нисбатан Россия Федерацияси Маъмурий ҳуқуқбузарликлар тўғрисидаги кодексининг 18.8-моддаси бўйича тегишли чоралар кўрилмоқда.
Шунингдек, ҳуқуқ-тартибот органлари қурилиш майдончаси атрофидаги транспорт воситаларини ҳам назоратдан ўтказди. Жами 87 та автомобиль текширилиб, аниқланган қоидабузарликлар юзасидан бир қатор маъмурий баённомалар расмийлаштирилди.
Санкт-Петербург полицияси миграция қонунчилигига риоя этилишини назорат қилиш бўйича бундай тадбирлар мунтазам равишда ўтказиб келинаётганини маълум қилди. Мигрантларга ўз ҳужжатларини доимо тартибда сақлаш ва Россия қонунчилигига риоя қилиш тавсия этилади.
