Сочи шаҳрида ўтган жума куни «Ҳуқуқ-тартибот» номли кенг кўламли профилактика рейди ўтказилди. Тадбирда Сочи ИИБ, транспорт полицияси, Федерал хавфсизлик хизмати ва Миллий гвардия ходимлари иштирок этиб, гараж-қурилиш кооперативлари ҳудудларини кўздан кечиришди.
Рейд давомида жами 244 та гараж текширилиб, 126 нафар фуқаронинг шахси аниқланди. Текширув натижасида 91 киши полиция бўлимига олиб кетилди, уларнинг 19 нафари хорижий давлатлар фуқаролари экани маълум бўлди. Қонунбузарлик содир этган 31 нафар шахсга нисбатан маъмурий жавобгарлик чоралари кўрилди.
Ушбу тадбирлар Россия миграция қонунчилиги талабларига риоя этилишини таъминлаш ҳамда жамоат хавфсизлигини сақлаш мақсадида амалга оширилмоқда. Мигрантлардан ўзларининг шахсини тасдиқловчи ҳужжатлари ва миграция қайдномаларини доимо ёнида олиб юриш ҳамда қонунчилик талабларига қатъий риоя қилиш сўралади.
Шунингдек, рейд доирасида вояга етмаганлар ишлари бўйича бўлинма ходимлари томонидан тунги вақтда назоратсиз юрган 28 нафар ўсмир аниқланган. Уларнинг ота-оналари билан профилактик суҳбатлар ўтказилиб, ҳудудий қонун ҳужжатлари бўйича тушунтириш ишлари олиб борилди.
