Россия Федерациясининг турли ҳудудларида ҳуқуқни муҳофаза қилувчи органлар томонидан миграция қонунчилиги ижросини таъминлаш бўйича профилактик тадбирлар ўтказилмоқда. Хусусан, Самара шаҳридаги қурилиш майдонларида ўтказилган рейдлар натижасида ҳужжатлари тартибда бўлмаган ўнлаб хорижликлар аниқланди. Қоидабузарликлар сабабли 63 нафар шахсга Россияга кириш тақиқланди, 16 нафар фуқаро еса мамлакатдан чиқариб юборилди.
Бошқа ҳудудларда ҳам назорат чоралари кучайтирилган. Масалан, Москва вилоятида ўтказилган текширувлар давомида 113 нафар хорижлик ички ишлар бўлимларига олиб келинган. Уларнинг 84 нафарига нисбатан мамлакат ҳудудини тарк етиш мажбурияти юклатилди. Саха (Ёқутистон) республикасида ўтказилган «Меҳнат мигранти» операцияси доирасида еса 114 та ҳуқуқбузарлик қайд етилиб, 16 нафар ноқонуний меҳнат қилаётган шахс чиқариб юборилди.
Перм ўлкасида жорий йилнинг биринчи ярми якунларига кўра, 6 мингдан ортиқ обект текширилиб, 3 мингга яқин қоидабузарлик аниқланган. Натижада юзлаб шахсларга нисбатан маъмурий чиқариб юбориш ва киришни тақиқлаш тўғрисида қарорлар қабул қилинган. Шунингдек, Ставропол ўлкасида хорижликларни ноқонуний ишга жалб қилган корхоналарга нисбатан йирик миқдорда жарималар белгиланди.
Миграция хизмати вакиллари иш берувчиларни қонун ҳужжатларига риоя қилишга чақирмоқда. Ноқонуний меҳнатдан фойдаланганлик учун корхоналарга 800 минг рублгача жарима солиниши ёки уларнинг фаолияти 90 кунгача тўхтатиб қўйилиши мумкин. Чет ел фуқароларидан ўз ҳужжатларини ўз вақтида расмийлаштириш ва миграция режимига қатъий амал қилиш сўралади.
