Халқлар дўстлиги ва миллатлараро тотувликни мустаҳкамлаш йўлидаги самарали меҳнатларни муносиб эътироф этиш мақсадида, Новокуйбышевск шаҳридаги Маданият саройида Халқ бирлиги куни муносабати билан тантанали маросим бўлиб ўтди.
Кенг жамоатчилик ва миллий диаспора вакиллари иштирок этган тадбир Россия Федерациясининг Давлат мадҳияси садолари остида бошланди.
Тантанали тадбир доирасида шаҳар ва вилоят миқёсида миллатлараро тинчликни сақлаш, маданий хилма-хилликни ривожлантириш ҳамда ижтимоий барқарорликни таъминлашга улкан ҳисса қўшиб келаётган фаоллар махсус мукофотлар билан тақдирландилар. Ҳудудда фаолият юритаётган энг йирик ва нуфузли ташкилотлар қаторида Ўзбек миллий жамоаси, Тожик миллий жамоаси ҳамда “Русская община” (Рус жамияти) вакилларига Новокуйбышевск шаҳар округи раҳбарининг расмий Ташаккурномалари тантанали равишда топширилди.
Мукофотларни шаҳар раҳбарияти номидан юқори мартабали расмийлар — шаҳар округи раҳбарининг биринчи ўринбосари ва маъмурият аппарати раҳбари Юлия Горбунова ҳамда шаҳар округи Думаси раисининг ўринбосари Илья Уваров топширдилар. Расмийлар ўз нутқларида ўзбек ва тожик диаспоралари ҳамда рус жамиятининг шаҳар ижтимоий-маданий ҳаётидаги ўрни беқиёс эканини, ушбу жамоалар халқлар ўртасидаги дўстлик кўпригини мустаҳкамлашда намуна бўлаётганини алоҳида қайд этдилар.
Эътиборли жиҳати, ушбу мукофотлар минтақада турли миллат вакилларининг ҳамжиҳатликда яшаши, мигрантларнинг маҳаллий жамиятга муваффақиятли интеграциялашуви ҳамда ўзбек ва тожик халқларининг бой маданий меросини муносиб тарғиб қилиш борасидаги тизимли саъй-ҳаракатларнинг юқори даражадаги эътирофидир.









