Россия Федерацияси фуқаролигини олиш учун топширилган ариза рад этилганда, бу автоматик равишда мамлакатдан чиқариб юборилишни англатмайди. Фуқаролик олишдаги рад жавоби сизнинг яшаш гувоҳномангиз (ВНЖ) ёки бошқа қонуний мақомингизни бекор қилмайди. Бундай ҳолатда энг муҳими — Россия ИИВдан рад этиш сабаблари кўрсатилган ёзма қарорни талаб қилиб олишдир.
2026-yilda фуқаролик беришни рад этишнинг 6 та асосий сабаби мавжуд: ҳужжатлардаги хатолар ёки сохта маълумотлар, судланганлик ёки жиноий таъқиб, қонуний даромад манбаи ёки тил билиш даражасининг етишмаслиги, Россияга кириш тақиқланганлиги, давлат хавфсизлигига таҳдид ҳамда бошқа давлатнинг ҳарбий ёки ҳуқуқни муҳофаза қилиш органларида хизмат қилиш.
Шуни ёдда тутиш керакки, 2026-йил 26-июлдан бошлаб фуқаролик учун ариза беришда 50 000 рубль миқдорида давлат божи ундирилади. Ариза рад этилган тақдирда, бу маблағ қайтариб берилмайди ва қайта мурожаат қилганда уни яна тўлашга тўғри келади. Агар рад этиш сабаби ҳужжатлардаги хато ёки даромад етишмаслиги каби бартараф этилиши мумкин бўлган ҳолат бўлса, уни тузатиб, дарҳол қайта ариза топшириш мумкин. Агар сабаб сохта ҳужжатлар ёки хавфсизлик билан боғлиқ бўлса, қайта мурожаат қилишга камида бир йилдан сўнг рухсат берилади.
Агар сиз рад этиш қарорини ноқонуний деб ҳисобласангиз, уни юқори турувчи ИИВ органига ёки туман маъмурий судига шикоят қилишингиз мумкин. Шикоят аризаси рад этиш тўғрисидаги қарор олинган кундан бошлаб 3 ой ичида тақдим этилиши шарт. Шикоят кўриб чиқилаётган вақтда сизнинг Россиядаги қонуний мақомингиз ўз кучида қолади.
Эслатиб ўтамиз, 18 ёшдан 65 ёшгача бўлган эркаклар (Беларус фуқароларидан ташқари) фуқаролик олиш учун ҳарбий хизмат билан боғлиқ қўшимча ҳужжатларни тақдим этишлари шарт. Мурожаатдан олдин барча маълумотларни текшириш ва юридик маслаҳат олиш тавсия этилади.
