Ставрополь ўлкасида 2027-йилда ёлланиб ишлаётган хорижий фуқаролар учун патент қиймати ойига 10 минг рублгача оширилиши мумкин. Регион ҳукумати томонидан ўлка думасига тегишли қонун лойиҳаси киритилган, деб хабар бермоқда “Аргументи и факти — Северний Кавказ”.
Қонун лойиҳасида патент нархини ҳисоблашда қўлланиладиган минтақавий коэффициентни 2026-йилдаги 2,5 дан 2027-йилда 2,7 гача ошириш кўзда тутилган. Ҳозирги вақтда ойлик тўлов миқдори 8,5 минг рублни ташкил этади.
Ўлка ҳукумати коэффициентни ўзгартириш заруратини ўртача ойлик номинал иш ҳақининг кутилаётган ўсиши билан изоҳламоқда. 2027-йилда ушбу кўрсаткич 78,6 минг рублни, ҳисобланган жисмоний шахслардан олинадиган даромад солиғи (НДФЛ) эса 10,2 минг рублни ташкил этиши мумкин.
