Татаристон Республикасида 2027-йилдан бошлаб хорижлик меҳнат мигрантлари учун патент тўловлари миқдорини ошириш режалаштирилмоқда. Минтақа Давлат кенгашининг бюджет қўмитаси меҳнат бозори хусусиятларини акс эттирувчи коэффициентни белгилаш тўғрисидаги қонун лойиҳасини маъқуллади.
Унга кўра, юридик шахслар ёки якка тартибдаги тадбиркорлар (ЯТТ) қўлида ишловчи чет эл фуқаролари учун патент нархи аввалги 7,9 минг рублдан 9,4 минг рублга кўтарилиши кутилмоқда. Жисмоний шахслар учун ишловчи мигрантлар эса ойига 13,3 минг рубл миқдорида тўлов амалга ошириши мумкин. Бу ўзгаришлар жами 19 фоизли ўсишни англатади.
Патент қийматини ҳисоблашда базавий солиқ ставкаси, дефлятор-коэффициенти (2,842) ва минтақавий коэффициент (2,77) ҳисобга олинади. Минтақавий коэффициентни белгилашда хорижлик ходимларнинг прогноз қилинаётган ўртача ойлик иш ҳақи (72,6 минг рубл) асос қилиб олинган. Расмийларнинг таъкидлашича, ушбу чора солиқ тушумларини кўпайтириш ва «яширин» тўловларнинг олдини олишга қаратилган.
Маълумот учун, 2025-йилнинг IV чораги ҳолатига кўра, Татаристон Россия бўйича хорижлик меҳнат мигрантларини жалб қилиш бўйича бешинчи ўринда туради. Мамлакат бўйлаб ўтган йили жами 2,3 миллионта патент расмийлаштирилган бўлиб, бу 2024-йилга нисбатан 9 фоизга кўпдир.
