Ленинград вилоятининг Сертолово шаҳридаги қурилиш майдончаларидан бирида 2-октябрга ўтар кечаси жиддий ҳодиса юз берди. Қурилиш вагончасида яшовчи 32 ёшли Марказий Осиё фуқароси пичоқ жароҳатлари билан шифохонага ётқизилди. Шифокорлар жабрланувчининг аҳволини оғир деб баҳоламоқда.
Ҳодиса жойига етиб келган ҳуқуқ-тартибот органлари ходимлари гумонланувчини аниқлади. 41 ёшли ватандош ўша куни қурилиш ҳудудида қўлга олинди. Дастлабки тергов маълумотларига кўра, можаро ўзаро маиший келишмовчилик сабабли юзага келган ва гумонланувчи бир неча бор пичоқ билан зарба берган.
Текширув давомида ҳар икки шахс ҳам Россия Федерацияси ҳудудида ноқонуний тарзда бўлиб тургани аниқланди. Мазкур ҳолат юзасидан жиноят иши қўзғатилиб, гумонланувчи вақтинчалик сақлаш ҳибсхонасига жойлаштирилди.
Россия қонунчилигига кўра, мамлакатда ноқонуний бўлиб турган хорижий фуқаролар нафақат маъмурий жавобгарликка, балки жиноят содир этган тақдирда оғир жиноий жазоларга тортилиши ҳамда жазо муддатини ўтаб бўлгач, мамлакатдан чиқариб юборилиши мумкин.
