Москва вилояти ҳуқуқ-тартибот органлари Серпухов шаҳар округида содир этилган мудҳиш қотиллик юзасидан тергов ҳаракатларини якунлаб, жиноят ишини судга юборди. Россия Тергов қўмитаси ва вилоят прокуратурасининг расмий баёнотига кўра, айбланувчи сифатида сўроқ қилинаётган 29 ёшли хориж фуқароси ўз фарзандини қасддан ўлдирганликда айбланмоқда.
Тергов материалларига кўра, воқеа 2026-йилнинг феврал ойида Серпухов округига қарашли Болшевик қишлоғидаги ижарага олинган хонадонда содир бўлган. Меҳнат мигранти бўлган аёл квартиранинг ҳаммомида тирик қиз фарзанд дунёга келтириб, тиббий ёрдамга мурожаат қилиш ўрнига янги туғилган чақалоққа пичоқ билан камида 16 марта оғир жароҳат етказган.
Гўдак олинган жароҳатлар оқибатида воқеа жойида вафот этгач, аёл жиноят изларини яшириш мақсадида унинг жасадини сочиққа ўраб, Ленин кўчасидаги кўп қаватли уйлар ҳовлисида жойлашган ахлат контейнерлари майдончасига ташлаб кетган. Чақалоқнинг жасади орадан икки ой ўтиб, 2026-йилнинг 21-апрел куни маҳаллий аҳоли томонидан тасодифан топилган. Жиноятни иссиқ излар орқали очиш имкони бўлмаган бўлса-да, замонавий криминалистика ва тиббий-генетик экспертиза ёрдамга келди. Ҳуқуқ-тартибот органлари хорижлик аёлнинг шахсини тез фурсатда аниқлашга муваффақ бўлишди, чунки гумонланувчи муқаддам Россия ҳудудига киришда мигрантлар учун мажбурий бўлган геном рўйхатидан (бармоқ изи ва ДНК намунасини топшириш жараёнидан) ўтган эди.
Чақалоқ ва воқеа жойидан олинган ДНК намуналари базадаги маълумотлар билан солиштирилганда тўлиқ мос келган. Ҳибсга олинган аёл тергов давомида ўз айбига тўлиқ иқрор бўлиб, қилмишидан пушаймонлигини билдирган ва ҳозирда у тергов изоляторида сақланмоқда. Серпухов шаҳар прокуратураси жиноят иши бўйича айблов хулосасини тасдиқлади ва материаллар мазмунан кўриб чиқиш учун Серпухов шаҳар судига юборилди. Аёлга нисбатан Россия Федерацияси Жиноят кодексининг 106-моддаси (Она томонидан янги туғилган болани ўлдириш) бўйича якуний ҳукм чиқарилади.
