Новосибирск вилоят судида инсоният ваҳшийлигининг энг мудҳиш кўринишларидан бири бўлган жиноят ишини кўриб чиқиш давом этмоқда. Суд залидаги темир панжара ортида турган айбланувчи — 28 ёшли Ўзбекистон Республикаси фуқароси Жўраев Ботирали Олимжон ўғли.
Асли Жиззах вилоятидан бўлган Ботирали Жўраев Россия Федерацияси ҳудудига пул топиш мақсадида келган. Бироқ, тергов материалларига кўра, у нафақат қонуний меҳнат фаолияти билан шуғулланмаган, балки Новосибирскда ўзи ижарага олган квартирада ҳақиқий "жиноий хонадон" ташкил қилган. Маҳаллий ҳуқуқ-тартибот органларининг маълумотларига кўра, Жўраев интернет орқали маҳаллий аёл билан танишиб, тез орада у ва унинг 3 ёшли қизи билан Новосибирскнинг Марказий туманидаги Красний проспектдаги квартирада бирга яшай бошлаган.
Аёл ва унинг кичик ёшли фарзанди Жўраевга тўлиқ моддий ҳамда турар жой жиҳатидан қарам бўлиб қолган. Бундан фойдаланган Жўраев 2026-йилнинг 25-мартидан 27-апрелига қадар уларни уйдан ташқарига чиқармай, ташқи дунёдан узиб қўйган. Суд материаллари ва гувоҳларнинг кўрсатмаларига кўра, зўравонлик ҳаракатлари деярли ҳар куни, кўпинча онанинг кўз ўнгида содир этилган:
• Март ойи охирида Жўраев 3 ёшли қизчани оёғи билан силтаб тепган. Бола полга йиқилганда, она қизини ўз танаси билан тўсиб қолмоқчи бўлган, бироқ зўравон аёлнинг қўлларига аёвсиз зарбалар берган. • Бошқа бир сафар у кичкина қизчанинг юзидан тишлаб олган. • Тергов хулосасига кўра, Жўраев апрел ойи бошида боланинг боши ва танасига камида 22 марта кучли зарба берган. Она фарзандини ҳимоя қилишга уринганида, Жўраев уни сочларидан судраб, деворга урган ва тепган. • Боланинг соғлиғи оғирлаша бошлаганини кўриб туриб, Жўраев уйга шифокорлар чақиришга мутлақо йўл қўймаган.
Апрел ойининг охирида қийноқлар янада мудҳиш тус олган. Қизча овқатланаётиб тиқилиб қолган пайтда, Жўраев унинг бошига қаттиқ урган ва бола мебелга бориб урилган. Шундан сўнг у қизчани оёқларидан турникка (хонадаги тўсиққа) тескари қилиб осиб қўйган ва унинг нозик танасига игналар санча бошлаган. Она қизчани қутқариб олишга муваффақ бўлганидан яқин, айбланувчи аёлнинг ҳам қўл ва оёқларини боғлаб ташлаган. Ўша куни кечроқ, қизчадан бутунлай халос бўлишни мақсад қилган Ботирали Жўраев боланинг юзи ва бошига бир неча бор уриб, матрас устига отган. Қизча ҳушини йўқотаётган бир пайтда, унинг қорнига жуда кучли зарба берган. Бу зарба бола учун ҳалокатли бўлган. Оғир аҳволда шифохонага етказилган қизча 2026-йил 28-апрел куни эрталаб реанимация бўлимида вафоти этган.
Ботирали Олимжон ўғли Жўраевга нисбатан Россия Федерацияси Жиноят кодексининг бир нечта оғир моддалари бўйича айблов эълон қилинган. Бунга икки кишини қийнаш, ожиз аҳволдаги болани шафқатсизлик билан ўлдириш ва вояга етмаган шахсга қасддан оғир шикаст етказиш бандлари киради. Ушбу моддалар бўйича унга умрбод қамоқ жазоси берилиши кутилмоқда. 13-октябрда ўтган биринчи суд мажлисида Жўраев қийноқлар ва қотиллик бўйича айбини мутлақо тан олмади. У фақат жаҳл устида қизчани урганини ва унинг ўлимини истамаганини айтиб, айбини қисман тан олган, холос. Суд қарори билан Жўраевни ҳибсда сақлаш муддати 2027-йилнинг 30-мартига қадар узайтирилди. Суд тергови давом этмоқда.
