Санкт-Петербургда яшовчи хорижлик фуқаро ўз шеригига нисбатан тажовузкорлик қилгани учун полиция томонидан қўлга олинди. «Mash na Moyke» каналининг хабар беришича, можаро йигит ва қиз ўртасидаги муносабатларга барҳам бериш жараёнида юзага келган.
Маълумотларга кўра, хорижлик фуқаро руҳий хасталик туфайли кунига 12 дона дори воситасини қабул қилиб келган. Бироқ, тиббий муассасага ташриф буюрганидан сўнг, шифокорлар ташхисни қайта кўриб чиқиб, дори дозасини камайтиришган. Шундан сўнг йигит ўз шеригига нисбатан тажовузкорлик кўрсата бошлаган.
Қиз муносабатларни узишга қарор қилганида, йигит аввалроқ совға қилган буюмлари ва харажатлари учун пул талаб қилган. Қиз рад жавобини бергач, у пичоқ билан таҳдид қилиб, шеригини ерга йиқитган ва бўғишга уринган. Қиз ўз вақтида онасига қўнғироқ қилиб, ёрдам сўрашга муваффақ бўлган.
Воқеа жойига етиб келган Россия ИИВ ходимлари хорижлик фуқарони қўлга олди. Ҳозирги вақтда унинг Россия Федерациясидан депортация қилиниши эҳтимоли кўриб чиқилмоқда.
