Новосибирскдаги «Толмачево» аэропортида божхона ходимлари йирик миқдордаги нақд пул маблағларини ноқонуний олиб чиқишга уриниш ҳолатини аниқлади. 35 ёшли хорижлик фуқаро Душанбе шаҳрига учиб кетмоқчи бўлган вақтида божхона назоратидан ўтаётган эди.
Текширув жараёнида кинолог ва хизмат ити — Бьорн лақабли фокс-терер йўловчининг қўл юкини текшириб, яширилган пулларни аниқлади. Маълум бўлишича, йўловчи хорижда автомобиль сотиб олиш учун 39,1 минг доллар олиб кетаётган бўлган. Қонунчиликка кўра, Россиядан декларациясиз олиб чиқилиши мумкин бўлган максимал сумма 10 минг долларни ташкил этади.
Сибир божхона бошқармаси маълумотларига кўра, йўловчи белгиланган чекловлардан хабардор бўлган. Ҳозирда мазкур ҳолат юзасидан Россия Жиноят кодексининг 200.1-моддаси 1-қисми (нақд пул маблағларини йирик миқдорда контрабанда қилиш) бўйича жиноий иш қўзғатилган.
Ушбу қоидабузарлик учун қонунда ноқонуний олиб ўтилаётган маблағ суммасидан уч баравардан ўн бараваргача жарима ёки икки йилгача озодликни чеклаш жазоси назарда тутилган.
