Владивосток шаҳридаги стоматология клиникасида юз берган можаро юзасидан суд қарори эълон қилинди. 35 ёшли Ўзбекистон фуқароси бўлган аёл шифокорга нисбатан ҳақоратли сўзлар ишлатиб, унга таҳдид қилганликда айбдор деб топилди. Ҳодиса давомида аёл шифокорга нисбатан жисмоний тажовуз кўрсатиб, ўз ҳаракатлари билан жамоат тартибини бузган.
Суд жараёнида аёлнинг қилмиши безорилик сифатида баҳоланди. Қонунчиликка кўра, ушбу турдаги ҳуқуқбузарлик учун 300 мингдан 500 минг рублгача жарима ёки озодликдан маҳрум этиш жазоси назарда тутилган. Бироқ, 17-сентябр куни бўлиб ўтган суд мажлисида аёлга нисбатан 200 минг рубл миқдорида жарима жазоси тайинланди.
Суд қарорида аёлнинг қарамоғида беш нафар вояга етмаган фарзанди борлиги ва унинг аввалги ижтимоий фаолияти енгиллаштирувчи ҳолат сифатида инобатга олинди. Жабрланувчи шифокор аёлни Россиядан чиқариб юборишни талаб қилган бўлса-да, суд уни депортация қилмаслик ҳақида қарор қабул қилди.
Таъкидлаш жоизки, Россия қонунчилигига кўра, жамоат жойларида шифокорларга нисбатан тажовузкорлик қилиш ва таҳдид солиш жиддий ҳуқуқбузарлик ҳисобланади. Ушбу воқеа мигрантлар учун Россия ҳудудида жамоат тартибига риоя қилиш ва тиббиёт ходимлари билан мулоқотда меъёрларни сақлаш муҳимлигини яна бир бор эслатади.
