Челябинск вилояти ИИВ Миграция масалалари бошқармаси ходимлари ОМОН кўмагида «Караван» озиқ-овқат бозорида «Ноқонуний мигрант» операцияси доирасида рейд ўтказди. Текширув давомида бозор ҳудудида ишлаётган хорижлик фуқароларнинг ҳужжатлари кўздан кечирилди.
Операция натижасида миграция қонунчилигини бузган 11 нафар хорижлик фуқаро аниқланиб, улар текширув учун полиция бўлимига олиб кетилди. Ҳуқуқ-тартибот органлари маълумотларига кўра, жами 11 та маъмурий ҳуқуқбузарлик ҳолати қайд этилган.
Аниқланган қоидабузарликлар орасида Россия Федерацияси ҳудудида бўлиш қоидаларини бузиш билан боғлиқ 8 та ҳолат, шунингдек, ноқонуний меҳнат фаолияти ва мажбурий тиббий кўрикдан ўтишдан бўйин товлаш каби ҳолатлар мавжуд.
Суд қарорига кўра, ушланган хорижлик фуқароларнинг 3 нафари Россия ҳудудидан мажбурий тартибда чиқариб юборилиши (депортация) белгиланди. Қолган фуқароларга нисбатан қонунчиликда белгиланган тартибда суриштирув ишлари давом эттирилмоқда.
