Россия ИИВнинг Чувашистон Республикаси бўйича бошқармаси ходимлари, Федерал хавфсизлик хизмати ва Миллий гвардия вакиллари билан ҳамкорликда қурилиш объектларида текширувлар ўтказди. Натижада миграция қонунчилигини бузган 4 нафар хорижлик фуқаро аниқланиб, уларга нисбатан маъмурий чоралар кўрилди.
Новочебоксарск шаҳридаги кўп қаватли уй қурилишида ишлаётган 2 нафар Тожикистон фуқароси патенти борлигига қарамай, ҳужжатда кўрсатилмаган мутахассислик бўйича ишлагани учун жавобгарликка тортилди. Уларга нисбатан Россия Маъмурий ҳуқуқбузарликлар тўғрисидаги кодексининг 18.10-моддаси 1-қисми билан баённома расмийлаштирилди.
Чебоксари шаҳридаги Энергетиков кўчасида жойлашган қурилиш объектида эса Мисрнинг 2 нафар фуқароси ноқонуний меҳнат қилаётгани аниқланди. Улардан бири талаба бўлиб, дарс вақтида ишлагани учун, иккинчиси эса рухсат берувчи ҳужжатларсиз меҳнат қилгани учун қонунбузар деб топилди. Ушбу шахсларга ҳам 18.10-модда бўйича жарима белгиланди.
Аниқланган қонунбузарликлар сабабли, хорижликлардан бирига 3 кунлик муддат ичида Россия ҳудудини тарк этиш мажбурияти юклатилди. Айни вақтда ҳуқуқ-тартибот идоралари томонидан ноқонуний ишчиларни ёллаган иш берувчиларга нисбатан ҳам текширув ишлари давом эттирилмоқда.
